Index - FAQ - Search - Membres - Groupes - Register - Messages PrivésLog in


  
pè i ghjunghjidicci
fate u piecè d'andà a leghje i termini

---------------------------------------------------------------------------------------
o corsu , 'ùn ti scurdà di a filetta!

salute à tè Guest



____________________________________________________________________________________________________


mi dispiece ma l'unica manera di publicà in lingua nustrale impone d'auprà u frencese in testa di scrittu-abbastanza longu-
VITA è ROBBA di PRIMA

 
Post new topic   Reply to topic    Foru corsu,lingua corsa,pulitica ,estri e cuntrasti nustrali, Forum Index -> a vità ,l'arti , a pratica spurtiva... -> vita e robba di prima
Previous topic :: Next topic  
Author Message
Lùlù


Offline

Joined: 17 Oct 2012
Posts: 261
parlatu: castagniccia
masciu o femina?: Masculin
rughjone: Ghisonaccia

PostPosted: Wed 12 Feb 2014, 17:34   Reply with quote

« VITA è ROBBA di PRIMA s’apre à i scritti novi nantu à l’usi è u campà di tandu senza ripete a nustalgia à scusa di parlà corsu .
Certi conti rimati ùn sò micca propiu puesia !
A prosa chi face a lea trà eri è oghje per fatti è manere d’esse sempre attuale traduce è porta puru scritta à pratica di a memoria ch’ùn hè più tantu prisente per e case è pessimu ….per e scole !
Si vole esse sole creazione testimone d’una lingua populare in l’unita di l’indule di a lingua
Scritta !... li mancherà sempre l’andatura di a musica cho pratichemu sempre trà di noi,
ma puru ùn si pò piantà di colpu di trasmette un’anima.
Simu tutti mezu che passati per e rime di i detti conti,canzone è chjam’è rispondi ma ùn hè che a prima scola .
Ci’hè tante manere di fà sendu sempre di filu !
Diccia per Estri Cuntrasti ci sò sempre i scrittori per mantene estri è Lingua
Tandu andemu, aviati da Paulu di Tagliu chi puru in lamentu hà scrittu l’attualità di tandu
è ùn hà micca scrittu che què .
Ghjuliu Bernardini hà pigliatu a seguita è ‘Funtana di San Petru’ hè un capu d’opera una di e più difficiule à cantà …..bè !
Senza pensà di ghjunghjeli mai à a ligaglia ùn hè micca per pavura d’intoppà è petre ch’ùn ci vole micca piglià u chjassu !

Back to top
Publicité






PostPosted: Wed 12 Feb 2014, 17:34  

PublicitéSupprimer les publicités ?

Back to top
Lùlù


Offline

Joined: 17 Oct 2012
Posts: 261
parlatu: castagniccia
masciu o femina?: Masculin
rughjone: Ghisonaccia

PostPosted: Fri 14 Feb 2014, 09:30   Reply with quote

Lagnu o lamentu casca ancu à quellu
ch’ùn a ponu dì. In più d’a mo parulla spergu avel’insetatu appena d’anima.

U SPAVECHJU

Incalfatu a paesanu
di beretta ò di capellu
nantu un pede senza manu,
di paglia pettu è cerbellu,
facciu « Sciù » per l’affanu
di a razza à pizzichellu.

Incrociatu per scumpientu,
sgangaratu mutu è guercciu
messu in vista per spaventu,
ascoltate oghje u lamentu
sprapersu da u libecciu,
di quellu corciu spavecciu.

Di u goffu sò u spechju
à posta per fà paura,
tempu natu sò più che vechju,
di cusi strana vistura
sò u pastore spavechju
chi cura a frutta matura.

Appicatu ò rittu in pianu,
ch’ell’ùn pizzichinu granu
l’ortaglia o a frutta fresca,
spostu a fà scappà l’acelli
facciu a streca sbirresca
per piace di i zitelli.

Stò beatu di veranu
per capi nera o casanu
d’agrottalli u so nidu,
tandu cambiu di sumiglia
sò fieru di u so stridu
d’esse babbu di famiglia.

Per stu pocu ùn sò più solu
si rallegra u mio palu
d’accunsentelli l’apollu
è mi campu d’avelli à collu,
mi pigliu basgiu per sciallu
di u so cacatu caldu.

O nustalgia luntana
cù l’inguernu è cutrura
da Libecciu èTramuntana
sò spogliatu è poca dura
a sumiglia falsa omana
più vera ch’a so natura.

Passata a stagione scorsa
ùn si teme vista è talozzu
di spavechju è francalossu,
infrancisata per forza
senza u s’incalcu a dossu
cusi ferma a lingua corsa.

§
Lùlù

Back to top
Lùlù


Offline

Joined: 17 Oct 2012
Posts: 261
parlatu: castagniccia
masciu o femina?: Masculin
rughjone: Ghisonaccia

PostPosted: Sun 16 Feb 2014, 17:31   Reply with quote

Ghjancarlu, Fringhellu è d’altri anu tantu amicizia che scritti di sottuscala
per apruvistà ssu tastu :

Eccu di Ghjancarlu Castelli :

"U MO STAZZU"
&
A fiancu di u"San Petrone"mille quattru è qualchi metru
Maì ci passerà stradone, mancu ci hè castelli in vetru
Ma, ci si trova u mo stazzu chi per mè vale un palazzu

Salvu di u rughju di a villa scappamenti di vittura
Sò felice ci vole a dilla, l'acqua è fresca l'aria è pura
Quandu sò ghjurnate chjare, di a terrazza vegu u mare

Ci ritruvemu in famiglia muntagnemu pè l'estate
Di nisunu aghju inviglia è, si per grazia cullate
Un sapite chi piacè, saria pè i mèi è per mè

L'anzianu stazzu di "Leone"cunnoscè una vita nova
L'accogliu chi vi prupone sarà la piu bella prova
L'usi antichi sò fermati,"Leone" ùn nu i sà purtati

Vi mustreremu altri stazzi, tutt'i cunnoscu pè nome
Qui,ghjera vita di strapazzi faciule à capisce comu
Micca sempre pè a muntagna ghjèra vita di cuccagna

S'ellu ci hè belle ripate fatte d'ingeniu è d'amore
S'elle ùn si nè sò falate, 'stè petre è tene u sudore
L'omu ghjè chi l'hà murate spessu a donna trascinate

Ferma un tribbiu in quà è in là, i pudete sempre vède
Lasciati pè ramentà ch'in st'aghjè si vò ùn sapete
Si tribiava orzu è granu, disgraziati chi ùn sànu

Sarà per mè un' onore parlavi cu fède è seriu
D'istu cantu di u Signore chi era u nostru "battisteriu"
Duve, si cunghjurava u male di acqua benedetta e sale

Pè mo mule ci aghju a stalla, in'altu ùn sò si tu saì
A bestia devi aggruttalla, cu a timpesta ùn si sà maì
L'animali quantu pòssu li dò un tettu a l'appòssu

U mo ghjuellu, u fornu, è teghjè maì sò ghjalate
L'aghju fattu chi u ghjornu, spessu qui sò tavulinate
Quand'ùn s'arruste caprettu, ghjè vitellu o muntunettu

Di Campidodicu i prati, di più parleria ma nenzu
Cullate site aspittati, ci truverete à "Lurenzu"
E a Santa benedizzione di u nostru "San Petrone"
&
Ghjuvan Carlu CASTELLI
"i Fulelli u 17 Ottobre 2011 (N°267)
&
§ Puesia scritta pè u mo amicu
"Lurenzu Emmanuelli" chi hà
sapiutu mentene l'usi di nostri
antichi è sempre difesu a nostra
lingua materna §

Back to top
Lùlù


Offline

Joined: 17 Oct 2012
Posts: 261
parlatu: castagniccia
masciu o femina?: Masculin
rughjone: Ghisonaccia

PostPosted: Thu 6 Mar 2014, 10:36   Reply with quote

à Ghjuvan’Lurenzu Ghjudice, imbastaghju in Polverosu, maestru d’arte è di lingua !

« Da chi ghjè chi a storia di u Corsu
hè sempre conta à spallozu »
U LAMENTU di L’IMBASTIU

Sempre à spalle soie,
l’omu insoma a storia,
sò l’imbastiu più degnu,
di ripiglià l’impegnu
chi più prestu ch’u mo legnu,
si tarla a so memoria .

D’un tichju di a natura,
so natu d’un legnu uncatu,
di quatru pedi infurcatu,
d’altre tantu incornatu,
di bella manifattura,
sò di forze infarratu.

Duie feltri per cuscini,
aghju amparatu prestu
casticatu da i spini,
trinicatu cum’un testu
à fà i mo primi passi,
ciambottatu per i chjassi.

M’anu messu d’estatina,
cù a mo prima cumpagna,
à fà per un mulateru,
una vita di macagna,
L’avemu stantatu à veru,
per trascinà a so panchina .

So statu dinò sposatu,
c’una sella cavallina,
per fà a vita staccata,
à ch’in stalla à ch’in cantina,
Quella Moglia Insignorata,
ùn l’aghju mai insomatu.

Pert tutti à corpu insù
sò sempre posìculu
quante volte cappiatu
à spinu capulatu
m’aghju accoltu ò Ciù,
à mezu u mo vèculu

Incu a mio amica funa,
sempre à soma per stradone
maì un s’impatta u sforzu,
ùn s’accuncia nè patrone
nè mancu cuscienza alcuna,
in a storia di u Corsu.

Per un tempu di vacanza,
m’hanu messu di riposu
à spassighjà cù zitelli,
inc’un sumeru slaziosu
tantu pulputu di panza,
chi ma troncu li lombelli .

Per a facende d’avà
si dimeza oghje lu stantu
quandu chi Marta filava
l’aghju fatta più che doppia
frustu so messu da cantu,
chi per fine, a groppa stroppia.

Per compie m’anu acasatu,
è mi trovu ancu piu tortu
da qualchi gattu sgrinffiatu,
da un cane runzicatu
mi tenenu mezu mortu,
per tàvula di salottu.

Back to top
Lùlù


Offline

Joined: 17 Oct 2012
Posts: 261
parlatu: castagniccia
masciu o femina?: Masculin
rughjone: Ghisonaccia

PostPosted: Fri 21 Mar 2014, 10:14   Reply with quote

GHJANCARLU CASTELLI:" IN TEMPI D 'USINA "

Falavanu da i paesi
A pedi o cu i sumeri
Un sò mica fatti 'ntesi
L'aghju vissuti, è sò veri
Quant'elli eranu straziati
'Ssi poveri disgraziati

Ci nè ghjera pentulacci
Castellaresi, taglinchi
Isulacciesi, piracci
Di u pogghju è talasaninchi
Cu a nève, tante volte
Prisenti, à rilevà è sciolte

I posti, chi s'invigliava
A e paghjole è à i forni
S 'ellu piuviia o nivava
Ghjeranu, i piu belli scorni
Ma chi stonde, disgraziose
Passavanu à e cuppose

Ghjeranu aperte à u ventu
Un tettu altu e cupriia
A maio perte di u tempu
Cu a nève, o si piuviia
Facianu e sedeci ore
Croscii d'acqua è di sudore

Poi, c'eranu i carrichjni
Incu quelli vacunetti
Quessi allora i puverini
Un 'eranu piu sottu à tetti
Cu 'sse frigine di a notte
Senza nè guanti nè botte

Ci eranu e squatre di u ghjornu
Chi, metravanu e legne
L'istate era un veru fornu
Ma, n'aghju vistu ancu pienghje
L'invernu quelle manoni
Piene à strina è à ghjaloni

Quessa, era a vita d 'usina
Passu ma, c'hè di piu forte
Un n'hè stata una ruina
Quandu anu chjosu, è porte
Chi e vazziche ricevute
Si pagavanu in salute

&
Ghjuvan Carlu CASTELLI
Fulelli u 14701/ 2010 (N°46)

Back to top
Lùlù


Offline

Joined: 17 Oct 2012
Posts: 261
parlatu: castagniccia
masciu o femina?: Masculin
rughjone: Ghisonaccia

PostPosted: Mon 7 Apr 2014, 23:42   Reply with quote

accuncciatu Òimè la corcia per fà tene à colpi di punti una scrittura sana
nantu à u screnu d'un solu sguardu ! pover'à noi !
__________________L'IMPRESTATICCI__________________________
Ghjuntu à l’ultimu ghjornu u pastore …………… Marzu è Aprile sò tanti più
s’era risu di Marzu : dicendu :…………………….......camonchji unu che l’altru

« Marzu catarzu, figliolu d’inviglione……………………....APRILE
aghju l’agnellu chi pare muntone…………………….
è facciu brocciu tamantu pentone »…………………Aprile mese stranu
è Marzu chjama à Aprile :………………. ………….à groppata piglia mosca
«Aprile,Aprile,fratellu gentile……………………….per pienghje à mezu spannu,
prestami dui dìi cù unu ch’o aghju…………………..stende sole è s’affosca
feraghju pente u falzu pecuraghju…………………...tene è cappia u veranu

Aprile risponde :……………………………………..Li trica di ghjunghje dopu,
« Ti ne prestu trè……………………………………..li scappa l’infurcatura,
Ma u primu u tengu per mè!»……………………passu ingordu, passu zoppu
Dicenu dinò :Aprile scemu è scioccu………………..ùn’inganna a natura,
Invece di trè li ne prestò ottu !.....................u pilone l’hà Maghjone
è sopra l’onde insunnulite…………………………….per veste tempu è stagione !
correrà u basgiu d’Aprile !................................................................§…………Lùlù

certi dicenu chi u pastore avia muntagnatu fin di Marzu ma e prime muntagnere si facianu di Maghju
per e fiere di San Pancraziu è di Francardu

Back to top
Lùlù


Offline

Joined: 17 Oct 2012
Posts: 261
parlatu: castagniccia
masciu o femina?: Masculin
rughjone: Ghisonaccia

PostPosted: Mon 14 Apr 2014, 09:12   Reply with quote

-Imprestaticci intesi contà da Ghjuvan Ghjaseppu Franchi di LOPIGNA
L’aghju ripigliati di capu, à estru meu ma i truverete in :
‘L’Imprestaticci’ : FOLE DI MAMMA :
Ghjuvan Ghjaseppu Franchi Cyrnos et Mediterranée 1981

A VINDETTA DI MARZU

U falzu pecuraghju chi avia stuzzicatu u vespaghju cacciendusila cù Marzu
hà avutu à pentesine chi Marzu ùn hè micca solu un mese, hè dinò un stellone rossu
dà quessa cugnomatu diù di a guerra !
I primi imprestaticci sò stati tremendi : tempurali è guai !
A banda era stata svilita è maladia è scarsia avianu spachjatu e pecure !
Ùn firmava che una pecurella zoppa chi u pastore si purtava sottu à u pilone per tenesi
caldi unu cù l’altra.
U falzu pecuraghju ùn era più che un veru specuratu ! : amici e ghjente fughjianu ‘ssu scumunicatu chi campava cum’un rimitu.
Qualch’anni dopu à l’attrachju nebbiosu di un trenta di Marzu vede sorte l’ombra
d’un omu scappatu d’ùn si sà d’induve.
L’andaccianu s’era persu per sti lochi è venia chere aloghju è buccone.
Era d’ùn pezzu chi u pastore ùn avia più parlatu cù nimu ma ùn s’era scurdatu di
l’ospitalità di a Mamma : « dà u megliu di cio chi ci’hè, è u megliu di sè stessu »
face entre l’omu à scalassi è ùn truva nunda altru che di sbatte a pecurella
per sparte u pastu cù u pocu di castagnina chi li firmava !
Dopu avè lacatu u so saccone à l’omu si stà à dorme calatu vicinu à u focu.
Quandu l’alba fredda u disceta s’arizza primaticiu per fà dui passi fora
Tempu spalancata a porta, vede u chjosu biancu d’ossi è di capi sprapersi è tandu strida :
« Currite ! currite ! si passa qualcosa quì !
L’omu affacca letu letu, li mette i mani nantu à e spalle è per sopra dice :
« OSSI OSSICELLI
PECUR’è AGNELLI !
OSSI OSSICONI
PECUR’è MUNTONI ! »
Tandu nasce un chjocculime d’ossi è di capaccie chi s’impolpanu, s’arrizzanu impicciati
è braganati di lana ! Tandu capimachja, u so segnu à l’arechja, a pecurella zoppa arreca a banda
à u pastore !
L’omu era San MARTINU !
Forse per dà una murale à ‘ssu fattu, chi fole ùn’hè ! dicenu chi dicenu chi cù i primi soldi
di i casgi è i brocci novi, u pastore pulitu è benvestutu hè andatu pietosu à accende un cerone per Marzu è un antru per San MARTINU !

« BON PRÒ VI FACCI ! »

Back to top
Contenu Sponsorisé






PostPosted: Today at 15:43  


Back to top
Display posts from previous:   
Post new topic   Reply to topic    Foru corsu,lingua corsa,pulitica ,estri e cuntrasti nustrali, Forum Index -> a vità ,l'arti , a pratica spurtiva... -> vita e robba di prima All times are GMT + 2 Hours
Page 1 of 1

 
Jump to:  

Portal | Index | Administration Panel | Create free forum | Free support forum | Free forums directory | Report a violation | Conditions générales d'utilisation
Powered by phpBB
Appalachia Theme © 2002 Droshi's Island

Designed & images by Kooky