Index - FAQ - Search - Membres - Groupes - Register - Messages PrivésLog in


  
pè i ghjunghjidicci
fate u piecè d'andà a leghje i termini

---------------------------------------------------------------------------------------
o corsu , 'ùn ti scurdà di a filetta!

salute à tè Guest


per luttà contru a maffia:
https://massimususini.corsica/

____________________________________________________________________________________________________


mi dispiece ma l'unica manera di publicà in lingua nustrale impone d'auprà u frencese in testa di scrittu-abbastanza longu-
Ghjuvan Filippu RISTORCELLI

 
Post new topic   Reply to topic    Foru corsu,lingua corsa,pulitica ,estri e cuntrasti nustrali, Forum Index -> estri e cuntrasti nustrali -> Disgrazie
Previous topic :: Next topic  
Author Message
Luigi Giacomoni


Offline

Joined: 26 Jan 2013
Posts: 558
parlatu: Rutali
masciu o femina?: Masculin
rughjone: Nebbiu

PostPosted: Sat 21 Sep 2019, 18:56   Reply with quote

Hè mortu u nostru amicone Ghjuvan Filippu Ristorcelli di Soriu stu 20 di settembre 2019 à l’età di 93 anni è mezu. I lettori di Estri è cuntrasti anu pussutu apprezzà qualchì una di e so puesie. Vede a rubrica rime è puesie fatte avà.
Cun ellu, a Corsica perde unu di i so più grandi pueti di versura tradiziunale in sistine o quartine di filari à ottu pedi o terzine di filari à sedeci pedi ma ancu autore di cumediole in rima è favule ispirate da La Fontaine o Florian.
Hà dinù pruduttu belle puesie in francese.
L’esequie si feranu in chjesa San Filippu Neri di Soriu luni 23 à 10 ore di mane poi sepultura in cimiteriu.

Eccu una di e so puesie esciuta in u Guida Cursichella Cap Corse Nebbiu in u 2004.


Nebbiu

In corsu vi vogliu scrive
Altrimente u vi leghju
Stu giru chì femu inseme
Una stonda m’arreghju
Per scopre ogni paese
In regione di u Nebbiu

À u pede di Monte Astu
Ci sò e trè sintinelle
Ùn s’assumiglianu micca
È purtantu sò surelle
Nate in stu vechju cantone
Chì si alza fin’à e stelle

Pertimu pè San Gavinu
È Santu Petru di Tenda
Da quì lu mio caru Soriu
Dopu avè fattu merenda
Quandu Moru anch’ellu
Hà finitu a so pruvenda

Sò quindeci perle rare
Chì formanu una curona
Da li monti à lu mare
Tuttu lu mondu si stona
Di ciò ch’hà fattu mi pare
U Signore in persona

Nenzu Casta è l’Agriate
Eranu senza bivetta,
San Fiurenzu, Ferringule
Patrimoniu è Oletta
Cun Barbaghju chì ci pensu
Di l’A.O.C. anu a tichetta

Ci hè a strada pè u vinu
Ind’ u mondu rinumatu
U ghjornu di San Martinu
Si tasta più d’un caratu
Cun noi biitelu puru
Ùn serete mai malatu

À cavallu o in carru
O di sera o di matina
Da a Roia di Ponte di ferru
Si dumineghja tutta a marina
Senza spende u denaru
Chì vi resta in stacchina

U vescu da a Citatella
Guarda rientre in portu
Battellucciu è bella barcella
Una vechja collitortu
In capu a panerella
Vende pesciu nancu mortu

Ùn sò quale chì l’hà detta
Purtantu l’aghju criduta
Si vede Poghju d’Oletta
Quandu chì di piove stuta
U sole luce mezoretta
Di più ch’in Olmeta di Tuda

In tempi di Napuleone
I nostri monti, i nostri piani
Vistu anu per Lancone
O per strada di Furiani
Cun stelle nant’à bastone
Ghjunghje à Sebastiani

Brocciu è salameria
Latte frescu è culatu
Ch’ete compru in Vallecalle
Per cullavvine in Muratu
Ma passendu per San Michele
Una campana hà sunatu

O di Pasqua o di Natale
Ùn si risica di fà dieta
Ind’è un grande casale
Si passava vita chieta
U nostru Babbu Pasquale
Ci chercava di muneta

Fasgioli bianchi è bon pane
In Rutali cottu à legne
Chì si manghja tutte e mane
Quandu u fornu si spegne
U cuccu ghjurnate sane
Di parte d’aprile, teme

In Rapale paese spartu
Quandu vi mettite in via
Un purtone hè sempre apertu
Ùn v’arrestate chè una cria
Un lasciapassà vi hè offertu
U ghjornu di Santa Maria

Tiratevi po’ in coda
Piazza di a chjesa in Pieve
Cun Murellu è Mortula
Bucentone vi riceve
Di l’Antichi a memoria
Per sempre facenu fede

A chjesa di San Michele
Surella di Chjesa Negra
Cù u so prufume di mele
San Cesariu s’integra
Cù a catedrale di u Nebbiu
A natura ci rintegra

Ind’ a pieve di San Chirgu
U paese d’Asigliani
Hà risistutu à u nimicu
Durante seculi sani
È s’hè spentu, a vi dicu,
Per d’astri lochi più piani

In Soriu mi ne ritornu
È lasciu sta nova pista
Cun quattru case, un fornu,
A vita ùn hè mai trista
Ma veniteci un ghjornu
À scopre a più bella vista


Ghjuvan Filippu Ristorcelli
Soriu, l’ottu di marzu di u 2002.

Back to top
Publicité






PostPosted: Sat 21 Sep 2019, 18:56  

PublicitéSupprimer les publicités ?

Back to top
estrimei
Mezanu

Offline

Joined: 07 Jun 2012
Posts: 1,924
parlatu: castinitincu
masciu o femina?: Masculin
età: francu i 70
rughjone: Corti -Rustinu

PostPosted: Sat 21 Sep 2019, 20:10   Reply with quote

a ringraziatti o Luì ,
ùn l'aghju cunisciuttu che per via di Dite a Vostra e pigliava sempre assai piecè a sentellu .
facciu e mò perte à a so famiglia e li mandu un salutu cumossu
"ndria
_________________
curegge i mio sbaglii face avanzà a lingua.

una lingua amparata , s'ella 'ùn hè praticata ,ancu 'ncù sbaglii , ùn ghjova a nunda

Back to top
Visit poster’s website
fringhellu


Offline

Joined: 10 Jan 2013
Posts: 278
parlatu: cismonte
masciu o femina?: Masculin
età: 72
rughjone: Nebbiu

PostPosted: Sun 22 Sep 2019, 09:22   Reply with quote

Cusì  bella cumpagnia soia, quella di a dolce puesia in ogni passu di a so vita! Ne averà racoltu quantu, cun Ella, piaceri  è cunforti, cunsigli di cunsolu è di saviezza ! A puesia porta l’omu voltu e cime di l’umanità. Ch’ellu riposi in santa pace. Cunduglianze à tutti i soi afflitti è in particulare à u so figliolu Ghjuvan Battistu, autore di u bellu libru « L’interru » chì m’hà datu tantu piacè à leghjelu è chì face parte, à parè meu, di e preziose  perle di a literatura corsa oghjinca. 
 

Back to top
Ghjuvan Carlu


Offline

Joined: 30 Nov 2014
Posts: 240
parlatu: Casinca
masciu o femina?: Masculin
rughjone: Fulelli

PostPosted: Sun 22 Sep 2019, 21:36   Reply with quote

A U NEBBIU IN DOLU

I quindeci paisoli di u rughjone di u Nebbiu
Un nù i lasceremu soli, cù noì, s’hè ristrettu un rebbiu
Da chi ‘ntesu e campane pè annunzià un murtoriu
S’hè capitu chi ssà mane tuccava u paese di Soriu

Ci hànu dettu, chi u puetu u ci riclama u supranu
Pè gode di un sonnu chètu qui solu à i santi dànu
Ghjuvan Filippu hà strappatu a funetta di a so vita
Parte ma, u so lasciatu, ghjè un’opera cumpita

Quante puesie, pròse, quante cumedie cuntatate
Quante cusi belle cose chi ci tenia allucate
Sti scritti risurteranu valori à bughju ùn si tene
Tandu nè riparleranu pè generazione à vene

Stù ghjornu di a partanza à tutti ci abbughja u core
Si dùra ghjè a spiccanza u puetu ellu, ùn pò more
Sò tristu quant’è cummossu saria stàta a mo primura
Malgradu u vulè ùn possu, andà sinu a sepultura

Vogliu fà parte di dolu a chi a sorte hà minatu
A so moglia u so figliolu è chi ùn hà risparmiatu
Per tutti aghju una pensata d’amicizia è di rispettu
A musa, mi sia grada di purtalli u mo affettu

Ghjuvan Carlu CASTELLI

i Fulelli u 20 di Settembre 2019

Back to top
talavesu


Offline

Joined: 05 Nov 2015
Posts: 26
parlatu: sutanacciu(taravu)
masciu o femina?: Masculin
età: 61
rughjone: taravu

PostPosted: Mon 23 Sep 2019, 14:49   Reply with quote

a ringraziavi o Lui, Fringhellu, Estrimei e Ghjuvan Carlu

Eù dino l'aghju intesu a "dite a vostra"
Cunduleanza a i soi.
RIP.
_________________
61 anni talavesu.
si campa in cità senza maì scurdaci di u nosciu paese.

Back to top
Di Sfughjita


Offline

Joined: 14 Jan 2013
Posts: 537
parlatu: quellu d'una micca corsa ch'ampara
masciu o femina?: Féminin
età: 50
rughjone: stò in Bastìa

PostPosted: Mon 23 Sep 2019, 15:51   Reply with quote

Aghju anch'eiu intesu l'omagiu fattu à issu Pueta preziatu. Mandu e mo parte à a sa famiglia è à Ellu li pregu un Dolce Viaghju è in Paradisu una Bon Sughjornu fattu di rime, fole è canzone.
_________________
À chì hà Tempu, ùn aspetti Tempu

Back to top
Contenu Sponsorisé






PostPosted: Today at 00:08  


Back to top
Display posts from previous:   
Post new topic   Reply to topic    Foru corsu,lingua corsa,pulitica ,estri e cuntrasti nustrali, Forum Index -> estri e cuntrasti nustrali -> Disgrazie All times are GMT + 2 Hours
Page 1 of 1

 
Jump to:  

Portal | Index | Administration Panel | Create free forum | Free support forum | Free forums directory | Report a violation | Conditions générales d'utilisation
Powered by phpBB
Appalachia Theme © 2002 Droshi's Island

Designed & images by Kooky